اپنے روزمرہ کے معمولات کا محاسبہ (checking)کرنا بے حد ضروری ہے کیونکہ اسی محاسبے سے آپ اپنی زندگی کو بہتر بنا سکتے ہیں۔ ہمارے بزرگانِ دین اور اسلاف کا بھی یہی معمول تھا۔ محاسبے کے اس عمل کو آسان اور منظم بنانے کے لیے آپ کی خدمت میں پیش ہے مکتبۃ المدینہ کا شائع کر دہ رسالہ ’’63 نیک اعمال ‘‘ ۔"63 نیک اعمال " کا یہ رسالہ خصوصاً اسلامی بہنوں کے لیے مرتب کیا گیا ہے۔ اس رسالے کے ذریعے امیر اہلسنّت دامت برکاتہم العالیہ نے نفس و شیطان کے دھوکے اور فریب سے بچنے کا ایک بڑا ہی آسان طریقہ متعارف کروایاہے ۔ اس سالہ میں روز مرہ کے معمولات سے متعلق مختلف سوالات ہیں یعنی نماز، درود پاک ، تلاوت قرآن وغیرہ، جن کے جوابات روزانہ دینے ہوتے ہیں اور مہینے کے آخر میں یہ رسالہ دعوت اسلامی کے ذ مہ داراسلامی بہن کے پاس جمع کروایا جاتاہے۔ اس رسالے میں مدنی انعامات کی تقسیم کچھ یوں ہے: یومیہ 47 نیک اعمال ،ہفتہ وار 5نیک اعمال، ماہانہ 3 نیک اعمال ،سالانہ 5 نیک اعمال، زندگی بھر کے3 نیک اعمال نیزاس میں قفل مدینہ کی کارکردگی بھی شامل ہے ۔ اس رسالے کو روزانہ ایمان داری سے پُر کر کے کوئی بھی اسلامی بہن اپنے اعمال کا جائزہ لے سکتی ہے کہ اس کے اعمال اچھے ہیں یا برُے ، وہ کتنا اسلامی تعلیمات پر عمل کر رہی ہے اور وہ کہاں کوتاہی کر رہی ہے ۔ اس رسالے کا مقصد یہی ہے کہ اگر کبھی کوئی اسلامی بہن اپنا محاسبہ کرتے ہوئے اپنی معمولات میں نیکیوں کی کمی اور گناہوں کی زیادتی پائے تو اللہ عَزَّ وَجَلَّ سے ڈرے اور گناہوں سے توبہ کرتے ہوئے نیکیوں میں کثرت کی کوشش کرے کہ گناہ کے بعد نیکی کرنا گناہ کو مٹا دیتا ہے۔ حدیث پاک میں ہے: کہ آخرت کے معاملے میں گھڑی بھر کیلئے غور و فکر کرنا 60 سال کی عبادت سے بہتر ہے۔ (الجامع الصغیر للسیوطی) ۔ نیک اعمال پُر(Fill) کرنے والے کے لیے امیر اہل سنت کی دعا ہے کہ یا اللہ عز و جل جو تیری رضا کے لئے نیک اعمال پر عمل کر کے روزانہ اس رسالے میں دیے گئے خانے پُر کر کے ہر ماہ اپنے ذیلی مشاورت کے نگران کو جمع کروائے تو اس کو عمل میں استقامت عطافرما کر اُس کو اپنا مقبول بندہ بنالے۔