حج اسلام کا پانچواں اہم رکن ہے۔ حج ایک ایسی عبادت ہے جو تزکیہ نفس کے ساتھ ساتھ مسلمانوں میں اتحاد کی فضا کو ہموار کرتی ہے۔ ہر مسلمان کے لیے یہ ضروری ہے کہ وہ حج کے ضروری مسائل کے بارے میں آگاہی حاصل کرے بالخصوص وہ خوش نصیب جن پر حج فرض ہو چکا ہے اور حج کے لیے جا رہے ہیں۔ یہ کتاب "رفیق الحرمین" حج و عمرہ کے مسائل پر لکھی جانے والی ایک جامع کتاب ہے۔اس کتاب میں حج کا طریقہ اور حج سے متعلق تقریبا تمام ہی ضروری مسائل کو ذکر کیا گیا ہے۔ اس کتاب میں فتاویٰ رضویہ اور بہار شریعت جیسی مستند کتابوں میں موجود مسائل کو آسان کر کے درج کیا گیا ہے۔ کتاب میں پہلے عمرہ کا مکمل طریقہ بیان کیا گیا ہے، اس کےبعد حج کی اقسام ، حج کے ارکان، حج کے واجبات اور مختلف مقامات کے لحاظ سے مسنون دعائیں بھی شامل ہیں۔ حاجی کے لیے سفرِ حج میں کن اشیاء کو ساتھ رکھنا ضروری ہے اور کن چیزوں سے بچنا ہے ان کا ذکر بھی اس کتاب میں موجود ہے۔ نیز روضہ رسول ﷺ پر حاضری کے آداب اور مدینہ منورہ کی زیارتوں کے بارے میں بھی تفصیلات موجود ہیں۔ آخر میں حج اور عمرہ کے دوران پیش آنے والے مسائل کو سوال وجواب کی صورت میں بیان کیا گیا ہے۔ جو حج پر جانے کا ارادہ رکھتے ہوں ان کے لیے یہ کتاب ایک مکمل پیکج ہے۔ حج پر جانے سے قبل اس کتاب کا اول تا آخر مطالعہ ضرور کرنا چاہیے اور دوران سفر بھی اسے ساتھ رکھنا چاہیے تا کہ کسی بھی قسم کی کوتاہی سے بچا جا سکے۔